De Kaméidi

De Bartrenger Kaméidi hat säin alleréischten Optrëtt am Hierscht 1974. Theater gespillt gouf scho méi laang zu Bartreng, mee e puer Leit aus dem deemolege Club des Jeunes wollten en Theaterclub mat eegene Statuten op d’Been setzen. De Jos Christen, éischte President vum Club, ass eis nach bis haut als Auteur vun Theaterstécker, Sketcher a Lidder erhale bliwwen.

Eis Akteure spille all Joer am Fréijoer Theater op der Bühn vum Centre Atert an am November Kabarä am Festsall vun der Museksschoul ARCA. Net nëmmen op der Bühn mee och hannert an nierwt der Bühn hu mir eis Leit déi bauen, schminken, d’Beliichtung man, … Och hannert dem Comptoir sinn ëmmer vill Leit gefrot, fir fir eise Spektateuren hiert Wuel ze suergen. Momentan zielt de Bartrenger Kaméidi 25 aktiv Memberen.

Niewt eisen eegenen Theater- a Kabaräsproduktiounen versiche mir och, eise Spectateuren regelméisseg flott Programmer vun namhaften Auteuren an Akteuren ze presentéieren. Sou war de Jemp Schuster beispillsweis schonn oft bei eis zu Bartreng. Mee och de Kanner wëlle mir eppes bidden. An deem Kader hate mer am Fréijoer 2010 den Agora-Theater mat engem ganz flotte Kannertheaterstéck engagéiert.

Mir freeën eis awer ëmmer iwwer nei Talenter déi zesummen mat eis duerch déck an dënn gin, awer virun allem mat eis wëlle Spaass hunn an hiert Kënnen op an nierwt der Bühn wëlle beweisen !

D’Grënnung

D’Grënnung vun eisem Theaterveräin war eppes ewéi eng Schwangerschaft déi iwwert d’Zäit gaang ass. Den 22. September 1972 hunn eng Rei vu jonke Leit sech zesummefonnt fir um Hunnefest „Den alen Hennes an der Huewer“, en 3-Akter vum Josy Christen, ze spillen. Do derniewt hunn am Club des Jeunes – zum Deel déi selwecht Leit – probéiert d’Interessi vun der Duerfjugend wakereg ze halen, doduerch datt se am Kader vum Club Interessegruppen geschaf hunn, haut géif ee vu Work Shop schwätzen, ënner anerem eng Theatergrupp. Dat huet och séier Wuerzele geschlo, mee scho virun enger éischter Opféierung gouf ee grousse Problem erkannt, an zwar d’Geld! Theateropféierunge kaschte Geld: fir Bühn, Geliichts, Droits d’Auteur, e Regisseur asw, ouni un eng Gage ze denken fir déi, di an 20 , 30 oder méi Prouwen missten d’Staang riicht halen. D’Aussiicht, datt bei engem Succès awer séier vill Geld an d’Keess komme kënnt, huet d’Fro opgeworf, ob de Club des Jeunes kënnt esouvill Geld fir e klenge Grupp vu senge Memberen investéieren a wéi di vill Suen vum eventuelle Succès de Memberen (all) zegutt kéimen? Déi Fro konnt fir de Club des Jeunes ni zefriddestellend beäntwert ginn an ’t gouf gesot: da grënne mer en Theaterclub! Dee selwechten Owend war och schon den Numm vum Kand gewosst! Dat eenzegt wat deemols um Spillplang stong, ware „Komödien“, oder „comédies“ , op gutt Lëtzebuergesch „Kaméidistécker“ an domat stong de „Bartrenger Kaméidi“ op feste Féiss. Den 19. September 1974 hat de Veräin Première mam 3-Akter vum Josy Christen „Sou kënnt een op den Hond“, an dat op der Bühn am Zelt vum Hunnefest.

Den 3. Mee 1975 waren di nächst Optrëtt, dat bei der Aweihung vum Schoul-, Sport- a Kulturkomplex, haut Polli genannt, wou de Kaméidi dann eng Rei vu Joere sollt seng Stammbühn hunn, éiert mer 1987 an Atert geplënnert sinn.

Presidentin
Josiane Schmit-Rauchs

Sekretärin
Veronique Rauen-Maas

Keesier
Diane Schwickerath-Simon

Memberen
Christine Hermes an Laurence Kieffer